🌹
SALIIMATU KO HOODERE KA DEWLE

Jiwɓe no ka jiwɓe, Saliimatu ko hoodere ka dewle, meetelol ngol soodetaake ittii e sikke tolmugol maa luɓagol, sabu deeƴii, feeñii ka sala oo jiwo wi’ɗo “Lan faalaa haa faɗɗaa” fii hertinngol timmude giggol fii moodi makko, on gorko barkinaaɗo, Moodi Usmaan Ba.

Saliimatu mo Mr Bah, 18 duuɓi, ko jiwo ɓennduɗo, finɗo, faamuɗo, barkinaaɗo, townayɗo honndu e nder leydi ndin fof sabu laaɓii ko hoodere tigi, hoodere finndinaynde majjuɓe e komooɓe, saƴƴita hakkile deye porto-parta maa miñan-porto tenntinii “sonntormaaje” ɗen.

“Si a nanii Mr Ba, ko Saliimatu. Lan faalaa haa faɗɗaa” – ko ɗii konnguɗi daɓɓi immorde jom pinal e faamu, woni dimmbude facebook gibi balɗe, haɗde ayɓe ɗaanagol, e hino finndina wedditiiɓe ka dewle mun.

Daakiiɓe Gine e wonɓe gaɗa keeri e nder adunaaru ndun, buy no humpaa, no rerɗi to yi’ude oo jiwo dimo mo fii mun wonaa fillondireede cenɗe fow. Gibi a rajoo FM, lowe internet, maa ɗeri facebook, no noddude, maa seenoo fii yewtidugol e Saliimatu mo Mr Ba.

E saai ka “Coronavirus” woni siiɓaade woonkiiji, ɗenƴina laamɓe, yirbina ɓeynguureeji; kono hannde wonii balɗe, sabu ndee hoodere hesre #Halimatou_mo_Mr_Bah , geece buy no jalbi, hitooji maɓɓe no deeƴi. Jiwɓe, rewɓe e worɓe immorde e yi’hitooji (videos), nate (photos) e binndi no foolotirde ka #SalimatouChallenge e hoore fija-jala.

Buy no jombi, buy no jombaa, kono 2020 ko fii Moodi Usmaan Ba e Saliimatu jom “Lan faalaa haa faɗɗaa”.

Mo waɗii FNDC, UFDG e RPG ka senngo peesirgal, “Lan faalaa haa faɗɗaa” foolay.
#Lan_faalaa_haa_faɗɗaa

Yo ayɓe seeeeeeku 😂

Saliimatu, bunngu leeƴoɗaa, ɓii moƴƴo;
Saliimatu, tippu yeƴoɗaa, ko a dimo;
Saliimatu, accu ɓe wowla, komo a18 duuɓi;
Saliimatu, moosu, a sonntaali, barkinaaɗo;
Saliimatu, hamdino, ko a julɗo;
Saliimatu, a wonii hoodere ka dewle;
Saliimatu, mantor:
“LAN FAALAA HAA FAƊƊAA”.
Ko an jey;
Ko giggol goonga, yo hoodere;
Ko ɓernde hisnde, yo hoodere;
Ko ngalu dimo, yo hoodere.

Saliimatu 💐, yo Allaah SWA barkin dewgal ngal, O arsika on jiidi barkundi, e O waɗe hoodere finndinaynde majjaaɓe hoore mun sabu tammaaji ko laamnata.
Aamiin Yaa Rab.

Kɗl© ABDALLAH BAH – Pullo on

Juma 16 Sabbordu Suumayee 1441
Vendredi 10 Avril 2020
Friday 10 April 2020

Contact: rfdi@radiofouta.info | Régie/Ads: pub@radiofouta.info | #radiofouta | www.radiofouta.info

Accu miijo ma :

E-mail maa on jaayntaake. Tummbe haanuɗe ɗen no maandinaa *

Open

Ramadan Mubarak

Close